English

Ad-dalu'r Gymuned

Mae Ad-dalu’r Gymuned yn gynllun newydd gan y Gwasanaeth Prawf Cenedlaethol. sy’n rhoi cyfle i bobl Ardal Dyfed-Powys ddweud eu dweud ynglyn â sut dylai troseddwyr ad-dalu’r gymuned.

Bob blwyddyn ar draws y wlad bydd cymunedau lleol yn elwa ar dros 6.5 miliwn o oriau o waith di-dâl gorfodol. Yn ardal Dyfed-Powys yn unig cwblhawyd dros 54,000 o oriau gan droseddwyr o siroedd Caerfyrddin, Penfro, Ceredigion a Phowys yn 2006/07. Fodd bynnag, bydd y gwaith hwn yn aml yn cael ei wneud heb i neb sylweddoli, ac felly mae trigolion nawr yn cael cyfle i chwarae rhan trwy benderfynu pa waith yr hoffent gael ei wneud.

Er bod y prosiectau’n golygu gwaith caled, maent hefyd yn rhoi cyfle i droseddwyr ddysgu sgiliau galwedigaethol a sgiliau bywyd pwysig. Maent yn helpu i atal y perygl o aildroseddu ac felly’n helpu i wneud ein cymunedau’n fwy diogel.

Mae grwpiau ffydd, busnes, grwpiau cymunedol, grwpiau gwirfoddol, elusennau, ysgolion ac awdurdodau lleol yn cael eu cymell i enwebu prosiectau ar gyfer y Gwasanaeth Prawf. Os caiff y prosiect ei dderbyn a phan fo’r gwaith wedi ei gwblhau, bydd yn derbyn logo neu dystysgrif “Ad-dalu'r Gymuned” er mwyn dangos lle mae troseddwyr wedi cyfrannu’n bositif at wella’u cymdogaeth.

Rhaid i bob prosiect fodloni’r meini prawf a ganlyn:
• Rhaid iddo fod o fudd i’r gymuned leol
• Ni ddylai gymryd gwaith oddi ar bobl gyflogedig
• Ni ddylai neb elwa’n ariannol ar y gwaith
• Rhaid iddo fod yn fuddiol, adeiladol a dylai roi sgiliau newydd i droseddwyr
• Rhaid i droseddwyr ddangos eu bod yn cyfrannu rhywbeth yn ôl i’r gymuned leol.

Gallwch anfon neges e-bost atom :
dppcommunity.payback@dyfed-powys.probation.gsi.gov.uk i ddarganfod mwy am sut i awgrymu prosiect Ad-dalu'r Gymuned. Gweler isod am ragor o fanylion.

Ymhlith y prosiectau a wnaed gan droseddwyr ac a fu'n fuddiol i gymunedau lleol yn ardal Dyfed-Powys, mae dileu graffiti, clirio ysbwriel a llystyfiant, trwsio ac ailaddurno canolfannau cymuned ac ysgolion, a gwaith amgylcheddol fel adfer mynwentydd a mannau chwarae. Mae esiamplau a prosiectau diweddar yn Cynnwys:

Rheilffordd Gwili, Caerfyrddin Mae Rheilffordd Gwili, Caerfyrddin, ar y rhestr fer ar gyfer Gwobr Signalau Westing House am adfer blwch signalau a godwyd yn 1895 ac sy’n dal i weithio. Gwnaed y rhan fwyaf o’r gwaith cadwraeth ar y blwch signalau gan droseddwyr yn gwneud Gwaith Di-dâl fel rhan o’u Gorchmynion Cymunedol dan oruchwyliaeth Prawf Dyfed-Powys. Mae’r grwpiau o droseddwyr wedi twtio’r blwch drwy glirio isdyfiant a phaentio. Maent hefyd wedi ail-baentio darn helaeth o'r platfform. Ar ben hyn, mae yna fwriad i estyn y rheilffordd, ac mae troseddwyr yn clirio coed er mwyn gosod trac newydd i gyfeiriad Caerfyrddin

Llanelli Mae’r prosiectau gwaith di-dâl yn Llanelli wedi amrywio o godi ysbwriel (cliriwyd 300 sachaid o sbwriel o Draeth Llanelli, 110 sachaid o sbwriel yn Felin-foel, ynghyd â llawer sachaid arall o sbwriel o Lwybr Seiclo Sustrans a Morfa) i glirio gerddi i bobl hyn trwy Gynllun Garddio Age Concern. Mae’r prosiectau eraill yn cynnwys paentio Canolfan Deulu St Paul, Bigyn; clirio llystyfiant ym Mynwent Old Road; paentio Neuadd Bentref Llan-saint; a gweithio yn Siop Elusen Scope yn Stryd Stepney.

Neuadd yr Henoed – Llangennech
Mae’r Neuadd wedi cael bywyd newydd, diolch i gymorth troseddwyr a fu’n ailaddurno’r tu allan a’r tu mewn, gan gynnwys gosod cegin newydd a roddwyd gan un o ganghennau lleol MFI.

Eglwys Dewi Sant – Llanddewi Felffre, Penfro
Tacluswyd Eglwys Dewi Sant yn Llanddewi Felffre y tu mewn a’r tu allan. Ysgrifennodd warden yr eglwys: “Mae’r gwasanaeth wedi gwneud cyfraniad gwych tuag at gynnal a chadw adeilad rhestredig hardd. Roedd y goruchwyliwr a’r troseddwyr a fu’n gweithio gydag ef yn frwdfrydig ac yn barod eu cymwynas ac roedd llawer yn meddu ar sgiliau da. Diolch yn fawr. Mae wedi gwneud gwir wahaniaeth.”

Ystafell Ddarllen Nolton Haven, Sir Benfro Bu troseddwyr yn rhoi help llaw yn Ystafell Ddarllen/Neuadd y Pentref yn Nolton Haven, ger Hwlffordd. Bu’r troseddwyr, a ddedfrydwyd i waith di-dâl gorfodol fel rhan o’u Gorchmynion Cymunedol, dan oruchwyliaeth Ardal Brawf Dyfed-Powys, yn gweithio’n galed yn harddu Ystafell Ddarllen y Pentref. Hyd yma, maent wedi paentio’r tu mewn, gan gynnwys y toiledau a’r gwaith pren. Hefyd, maent wedi clirio’r llystyfiant o amgylch yr adeilad ac wedi adnewyddu’r pren a oedd wedi pydru. Daeth y prosiect i ben pan adnewyddwyd ac ail-baentiwyd tu allan yr adeilad.

Powys
Mae’r prosiectau gwaith di-dâl ym Mhowys wedi amrywio o godi gwelyau uchel fel bod cleifion yn gallu tyfu llysiau yn yr Ardd Gymunedol yn Ysbyty Ystradgynlais i drwsio dodrefn ac ail-baentio’r ystafell gerddoriaeth yng Nghanolfan Ieuenctid Pen-rhos. Mae’r trigolion hyn wedi elwa ar y cynllun garddio yn Aberhonddu ac mae troseddwyr wedi clirio ysbwriel oddi ar Ystad Pen-rhos fel rhan o’r rhaglen Cymunedau yn Gyntaf.

Hefyd, mae troseddwyr wedi bod yn paentio bolardiau ac yn codi ysbwriel yng nghanol tref Ystradgynlais. Yn Sir Faesyfed, mae’r prosiectau wedi cynnwys ailwampio Ysgol yr Eglwys yng Nghymru yn Nhrefyclo ac Ysgol Gynradd Howey yn Llandrindod, twtio y tu mewn a’r tu allan i gartref seibiant Ymddiriedolaeth Bracken yn Llandrindod ac addurno ty cwrdd Y Pale i’r Crynwyr yn Llandegle

Ceredigion Cafwyd prosiectau gwaith di-dâl ledled Ceredigion, a oedd yn amrywio o dwtio glan y môr yn Aber-porth drwy baentio meinciau a rheiliau; paentio ac addurno Canolfan Gymuned Aber-porth; ailwampio y tu mewn a’r tu allan i Neuadd Goffa Aberaeron; plannu gardd yn Ysgol Gynradd Cwmpadarn i glirio mynwentydd Capeli Llanwenog a Llanfihangel y Creuddyn. Mae henoed Ceredigion hwythau wedi elwa oherwydd y gwaith cynnal a chadw a wnaed mewn 35 o erddi drwy Help the Aged a’r Adran Dai.

Mynwent Rhiw Briallu, Ceredigion
Yn ddiweddar, trwy Gyngor Sir Ceredigion, mae Mynwent Rhiw Briallu yn Llanbadarn Fawr wedi cael darn arall o dir wrth ymyl y fynwent wreiddiol. Cliriwyd y fynedfa i’r tir hwn, codwyd wal flociau a chrëwyd sawl llecyn concrid i ddal biniau. Gwnaed y gwaith hwn gan dîm o droseddwyr dan Orchmynion Gwaith Di-dâl ynghyd â goruchwyliwr.

Bob blwyddyn, ar draws y wlad, bydd cymunedau lleol yn elwa ar dros 5 miliwn o oriau o waith di-dâl gorfodol gan droseddwyr dan oruchwyliaeth y Gwasanaeth Prawf Cenedlaethol.

Allwn ni ddim gwneud hyn heb eich help chi! Rhaid i ni gael gwybod am brosiectau rydych chi'n credu y gallem weithio arnyn nhw.

Gallwch anfon neges e-bost atom:
dppcommunity.payback@dyfed-powys.probation.gsi.gov.uk

Yn ôl i frig y dudalen