English

Y Model Rheoli Troseddwyr

Mae gan y Rheolwyr Troseddwyr yr awdurdod i gyfarwyddo’r dilyniant ymyriadau yn seiliedig ar asesiad o’r troseddwr. Bydd yna “Swyddog Cyfrifol” yn unol â’r disgrifiad yn Neddf Cyfiawnder Troseddol 2003 Adran 5.3-5.6 a Safonau Cenedlaethol 2005.

Bydd y Rheolwyr Troseddwyr yn datblygu cynllun dedfryd, ar y cyd â staff allweddol eraill (gan gynnwys staff Gwasanaeth Carchar), a fydd yn cynnwys elfennau carcharol a chymunedol y ddedfryd. Bydd y Rheolwr Troseddwyr yn bwynt cyfeirio cyson i’r troseddwr ac yn cynhyrchu cynllun dedfryd cydlynol sy’n gosod unrhyw ymyriadau yn y broses cynllunio dedfrydau yn gyffredinol.

Gall swyddogaeth y Goruchwyliwr Troseddwyr gael ei gweithredu gan y Rheolwr Troseddwyr neu gellir enwebu Goruchwyliwr Troseddwyr. Fodd bynnag, os yw troseddwyr yng nghyfnod carcharol eu dedfryd, ac wedi’u cynnwys ym Model Cenedlaethol Rheoli Troseddwyr, fe fydd y Goruchwyliwr Troseddwyr yn aelod staff yn y sefydliad lle mae’r troseddwr yn bwrw tymor mewn carchar. Pan fo’r ddwy swyddogaeth wedi’u rhannu, bydd y Goruchwyliwr Troseddwyr yn derbyn cyfrifoldeb ar ran y Rheolwr Troseddwyr i ymgymryd â gwaith penodol a bod yn gyfryngwr ar gyfer ymyriadau a ddynodwyd yn y Cynllun Dedfryd. Bydd y Goruchwylwyr Troseddwyr yn cynorthwyo troseddwyr i gydymffurfio â'r ddedfryd ac yn cynnal perthynas gynhyrchiol â staff eraill sy’n ymwneud â’r troseddwyr.

Bydd y Goruchwylwyr Troseddwyr yn chwarae rhan allweddol wrth gynnal cysylltiad adeiladol â’r ddedfryd ac ysgogi a chefnogi’r Troseddwyr.

Bydd y Gweithwyr Allweddol yn gweithredu’r gosb neu ymyriad gofynnol o fewn fframwaith y Cynllun Dedfryd sengl. Byddant yn aelod o’r Tîm Rheoli Troseddwyr ac yn rhan o’r broses adolygu cynllunio dedfrydau.

Mae’r Gweinyddwyr Achos yn hanfodol i weithrediad y Model Cenedlaethol Rheoli Troseddwyr ac mae ganddynt gyfrifoldeb dros amseru, trefnu, a dilyn gweithrediad pob elfen o’r cynllun dedfryd. Pan fo troseddwyr yng nghyfnod carcharol eu dedfryd, ac wedi’u cynnwys ym Model Cenedlaethol Rheoli Troseddwyr, fe fydd y Gweinyddwr Troseddwyr yn aelod staff yn y sefydliad lle mae’r troseddwr yn bwrw tymor mewn carchar.

Y Tîm Rheoli Troseddwyr yw’r grwp sy’n gweithio gyda phob troseddwr yn unigol er mwyn gweithredu’r Cynllun Dedfryd. Bydd yn cynnwys y swyddogaethau a ddisgrifir uchod a gall gynnwys staff Carchar a staff Ardal Brawf Dyfed-Powys.

Trefniadau Dosbarthu:
Egwyddor graidd Model Rheoli Troseddwyr NOMS yw bod adnoddau’n dilyn risg. Mae'r Fframwaith Dosbarthu (Arweiniad i Staff PC65 /2005 a Gweithdrefnau Rheoli Troseddwyr) yn cynnig canllawiau clir ynglyn â sut mae cyflawni hyn yn ymarferol trwy ddefnyddio meini prawf cytunedig. Mae yna gysylltiad hefyd â Deddf Cyfiawnder Troseddol 2003, gydag argymhellion adroddiadau llys yn cael eu cysylltu â difrifoldeb, risg a’r ‘ymagwedd’ orau ar gyfer pob troseddwr.

Mae’r broses Ddosbarthu yn rhan hollbwysig o’r egwyddor graidd o fewn Model Rheoli Troseddwyr NOMS i’r troseddwr. Mae’n cynnwys cydnabod yr angen i gymhwyso’r fframwaith er mwyn cynnwys barn broffesiynol wrth lynu wrth feini prawf y fframwaith. Mae defnyddio’r Fframwaith Dosbarthu yn gywir yn elfen hollbwysig o gyflwyno Model Rheoli Troseddwyr NOMS yn Nyfed-Powys a rhaid ei ddefnyddio fel sail dyrannu adnoddau i’r ddedfryd a’r troseddwr.

Terfynau Dosbarth a Swyddogaeth:
Mae egwyddorion Model Rheoli Troseddwyr NOMS yn seiliedig ar fframwaith o gael adnoddau i gyd-fynd â gwahanol risgiau ac anghenion y troseddwr unigol. Felly, yr effaith weithredol yw bod “adnoddau yn dilyn risg” a’r egwyddor ymyriadau “lleiaf angenrheidiol”. Mae Ardal Brawf Dyfed Powys yn dilyn canllawiau’r Gwasanaeth Prawf Cenedlaethol a’r Gwasanaeth Cenedlaethol Rheoli Troseddwyr (NOMS) wrth ddewis Rheolwyr Troseddwyr ar gyfer troseddwyr:-

Troseddwyr Dosbarth 1 a 2 - Rheolwyr Troseddwyr sy’n Swyddogion Gwasanaeth Prawf (PSO)
Troseddwyr Dosbarth 3 a 4 - Rheolwyr Troseddwyr sy’n Swyddogion Prawf (PO)

Gall y Goruchwyliwr Troseddwyr fod yr un person â’r Rheolwr Troseddwyr. Fodd bynnag, gall Goruchwylwyr Troseddwyr PSO weithio gyda throseddwyr ym mhob dosbarth, gyda chytundeb eu rheolwr llinell.

Rheoli Troseddwyr o un pen-i’r-llall:
Mae’r broses Rheoli Troseddwyr o un pen-i'r-llall yn ganolog i Fodel Rheoli Troseddwyr NOMS ac mae’n darparu’r fframwaith cyfunol ar gyfer dewis, trefnu a gweithredu ymyriadau. Mae’n rhychwantu’r holl ddedfryd ac mae iddi dair prif elfen:-

Rheolaeth: Mae'r broses gyffredinol yn eiddo i’r Rheolwr Troseddwyr sy’n darparu cyfeiriad, trefn, cyflymder a ffurf y ddedfryd.

Goruchwylio: O fewn y model, dyma’r dilyniant o dasgau a gweithgareddau beunyddiol ac wyneb yn wyneb sy'n ofynnol er mwyn sicrhau a chynnal cydymffurfiad â’r ddedfryd.

Gweinyddu: Mae’r prosesau gweinyddu yn trefnu’r isadeiledd cofnodi a chyfathrebu sy’n sicrhau gwneud y peth cywir ar yr adeg gywir.

Dilyniant: Dylid cael dilyniant o ran rheolaeth, gofal a thriniaeth a graddau rhesymol o ddilyniant o ran perthynas drwy’r ddedfryd. Dylai hyn gynnwys cysondeb yn neges ac ymddygiad pawb sy'n gweithio gyda'r troseddwr.

Cynllunio Dedfryd:
Mae Cynlluniau Dedfryd yn seiliedig ar yr asesiad OASys, sef nodi sut a phryd y gweithredir gofynion y ddedfryd er mwyn delio ag anghenion a risg troseddogenig. Rhaid i’r Cynllun gynnig trefn resymegol ar gyfer ymyriadau a gosod amcanion mesuradwy a chyraeddadwy.

Rhaid datblygu’r Cynllun ar y cyd â’r troseddwr. Rhaid ei rannu â holl aelodau’r Tîm Rheoli Troseddwyr a’i adolygu ar yr adegau penodedig.

Mae’r Cynllun Dedfryd yn fodd i weithredu’r ddedfryd fel bod llai o debygolrwydd o aildroseddu a llai o risg i eraill.



Yn ôl